د ارواپوهنې ديپارتمنت محصلينو له لوري د پوسټر پرېزېنټېشن په بڼه د څېړنيزو پروژو پايلې شريکې شوې
سيد جمال الدين افغاني پوهنتون د ښوونې او روزنې پوهنځي د ارواپوهنې ديپارتمنت(۲۵) تنو محصلينو له لوري د ترسره شويو ساحوي څېړنو پايلې د یوې غونډې په ترڅ کې د پوسټر پرېزېنټېشن له لارې د پوهنتون مسؤلینو، استادانو، محصلینو او د ولایتي ادارو له استازو سره شريکې شوې.
غونډې ته د ياد پوهنتون رييس شيخ عبدالمالک محسن د علم او څېړنې پر ارزښت او اهميت تفصيلي خبرې وکړې او په دې برخه کې يې محصلين لا نورو نوښتونو ته وهڅول او هغوی ته يې د خدمت او تر فراغت وروسته د مسؤليت په تړاو لازمې توصيې وکړې.
د ښوونې او روزنې پوهنځي رييس پوهنيار مولوي خانزاده حنيفي او د ارواپوهنې ديپارتمنت آمر پوهنيار عبدالرحمن عابد په خپل وار د غونډې برخهوالو ته د ياد پروگرام په تړاو معلومات وړاندې کړل او له تنظيموونکو يې مننه وکړه. ورپسې محصلينو د خپلو څېړنو پايلې د غونډې گډونوالو ته د پوسټر پرېزېنټېشن په بڼه وړاندې کړې.
د يادونې ده چې د پوهنتون رييس د ياد پروگرام سربېره د ښوونې او روزنې پوهنځي د رياضي او فزيک او پښتو ژبې او ادب ديپارتمنتونو د محصلینو د مونوگرافونو د دفاع په پروگرامونو کې گډون وکړ او تر فراغت وروسته يې د محصلينو پر مسؤليتونو هر اړخيزې ويناوې وکړې.
