د زارعت پوهنځي څلورم ټولگي محصلینو ته د کارموندنې مؤثرې لارې چارې تر سرليک لاندې يو ورځنی سېمينار دایر شو
دغه روزنيز سېمينار چې د سيد جمال الدين افغاني پوهنتون د زارعت پوهنځي د ځنگلپوهنې او طبيعي منابعو ديپارتمنت له لوري د پوهنتون مسلکي پرمختيا آمريت په همکارۍ جوړ شوی ؤ، لسگونو محصلينو په کې برخه لرله. پيل کې د ځنگلپوهنې او طبيعي منابعو د ديپارتمنت آمر پوهنيار شاهدالله امن په خپلو خبرو کې ياد سېمينار د محصلينو د ظرفيت لوړونې په برخه کې مهم وباله او له برخهوالو يې غوښتنه وکړه چې په خپل فعال گډون سره د سېمينار له ټولو مطالبو د مهارتونو په زياتونه کې پوره گټه واخلي. ورپسې د ياد ديپارتمنت استاد پوهنيار سيد رحمت الله سادات د دندې غوښتليک چمتو کولو، د دندې لټون وېبپاڼو او د مرکې مهارتونو په تړاو چمتو کړي معلومات وار په وار تشرېح کړل او همداراز يې د گډونوالو پوښتنې هم ځواب کړې.
د يادونې ده چې برخهوالو محصلينو د سېمينار پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه.
