د زراعت پوهنځي استادان چې د دوکتورا او ماسترۍ زدهکړو له بشپړولو وروسته هېواد ته راستانه شوي وو، د يوې غونډې په ترڅ کې وستايل شول
غونډې ته د سيد جمال الدين افغاني پوهنتون د زراعت پوهنځي رييس پوهندوی محمد حسن محمدي په خپلو خبرو کې د يادو استادانو راتگ د هېواد پرمختگ او تحصيلي سېستم د پياوړتيا لپاره مهم ياد کړل او هغوی ته يې د علمي څېړنو او تجربو په تطبيق کې د همکارۍ ډاډ ورکړ. نوموړي ياد استادان مخاطب کړل چې له زده علومو او تجروبو څخه د نوي نسل د روزنې په برخه کې کار واخلي او هېواد د ابادۍ لپاره نه ستړې کېدونکې هلې ځلې وکړي. ورپسې د يادو استادانو په استازۍ پوهنمل دوکتور امين الله نورزي وويل: وياړ لري چې د لوړو زدهکړو وزارت په چوکاټ کې خپله دنده مخته وړي او همداراز يې د ياد وزارت او پوهنتون له مشرتابه مننه وکړه چې د تحصيل زمينه یې ورته برابره کړې وه. نوموړي ژمنه وکړه چې خپل زدهکړي مهارتونه او تجربې به د هېواد ځانبساينې او ځوان نسل د روزنې لپاره وکاروي. د يادونې ده چې پوهندوی دوکتور عزيزالله خليلي او پوهنمل دوکتور امين الله نورزي د دوکتورا تحصيلي درجې او پوهنيار جمال الله پيوستون د ماسترۍ په کچه د خپلې تحصيلي دورې له بشپړولو وروسته بيا ځل د پوهنتون تدريسي او علمي چاپېريال ته راستانه شول. د ناستې په پای کې ياد استادان د پوهنځي مشرتابه له لوري د ډاليو په ورکړې سره وستايل شول.
