د لوړو زده کړو وزیر د یو محصل له لوري د بل محصل د قتل د عفوې او روغې جوړې په غونډه کې ګډون او وینا وکړه
د لوړو زده وزیر محترم شیخ الحدیث مولوي نداء محمد ندیم صاحب پکتیا ولایت ته په خپل سفر کې، د سید جمال الدین افغاني پوهنتون د یو محصل له لوري د بل محصل قتل، چې اصلي د پکتیا اوسېدونکی و د عفوې او روغې جوړې په غونډه کې ګډون او وینا وکړه.
د لوړو زده کړو کړو وزیر په یاده غونډه کې، چې په پکتیا ولایت کې جوړه شوې وه، وویل: «هر محصل د خپل زوی حیثیت راته لري، مقتول داسې راته ښکاري لکه خپل زوی مې چې شهید شوی وي، شهید ته د الله تعالی له دربار څخه د جنت او کورنۍ ته یې د جمیل صبر غوښتنه کوم، الله تعالی دې نعمل البدل ورکړي.»
محترم شیخ صاحب وویل، چې درې مجلسونه الله تعالی د خیر مجلسونه بللی دي، یو هغه چې خلکو ته پکې په صدقه او خیر رسولو امر کېږي، دویم هغه چې امر په معروف پکې کېږي او درېیم هغه چې د دوو مسلمانانو د صلحې مجلس وي؛ نو دا ډېر د خیر مجلس دی.
همدا راز محترم شیخ صاحب د شهید کورنۍ صبر ته راوبلله، د عفوې له امله یې د الله تعالی له دربار څخه د عظیم اجر غوښتنه ورته وکړه او هغوی ته یې په خطاب کې ویل، چې د الله تعالی له لوري امتحانونه راځي، غمونه او مصیبتونه راځي خو مسلمان باید صبر وکړي او الله تعالی له صابرینو سره دی.
د یادونې وړ ده چې څه موده وړاندې د پکتیا ولایت اوسیدونکی او د سید جمال الدین افغاني پوهنتون محصل د یاد پوهنتون بل محصل له لوري په قتل رسېدلی و، چې د مشرانو او سپین ږیرو په هڅو د مقتول کورنۍ قاتل ته عفوه وکړه.
