د مخابراتو او معلوماتي ټکنالوجۍ وزیر له کونړ سيد جمال الدين افغاني پوهنتون څخه ليدنه وکړه
د مخابراتو او معلوماتي ټکنالوجۍ وزیر الحاج مولوي نجیب الله حیات حقاني؛ کونړ ولايت ته د خپل سفر په ترڅ کې له نوموړي پوهنتون څخه د ليدنې پرمهال د معلوماتي ټکنالوجۍ په برخه کې د پوهنتون مشرتابه ته د پوره همکارۍ ډاډ وکړ.
پیل کې د پوهنتون رييس شيخ عبدالمالک محسن راغلو مېلمنو ته ښه راغلاست ووايه او د معلوماتي ټکنالوجۍ په برخه کې يې شته ستونزې له محترم وزير صيب سره شريکې کړې.
ورپسې د ياد پوهنتون د کمپیوترساینس پوهنځي رييس پوهنيار ذاکرالله عزام د پوهنتون په کچه د نوې ټکنالوجۍ په برخه کې د پرمختگونو، لاسته راوړنو، شته ستونزو او راتلونکو پلانونو په اړه پرېزنټیشن وړاندې کړ.
وروسته د مخابراتو او معلوماتي ټکنالوجۍ محترم وزیر د علم پر ارزښت او په ځانګړي ډول د نوې ټکنالوجۍ پر اړتيا او مثبتې کارونې په تړاو تفصيلي خبرې وکړې او د پوهنتون له استادانو يې وغوښتل چې خپل تدريس مېتود د نوي عصر له غوښتنو سره سم برابر کړي، تر څو هېواد مو پرځان بسيا شي.
الحاج مولوي نجیب الله حیات حقاني د کونړ سيد جمال الدين افغاني پوهنتون مشرتابه ته د برېښنايي کتابتون، کمپيوټر لب او د انټرنېټ په برخه کې د پوره همکارۍ ډاډ ورکړ.
