د پنځهگونو پوهنځيو له محصلينو څخه رقابتي ازموينه واخيستل شوه
په سيد جمال الدين افغاني پوهنتون کې له محصلينو څخه د شرعي نظام په استحکام کې د اطاعت اغېزې کتاب کې د سيالۍ په موخه ازموينه واخيستل شوه.
دغه سيالي چې د محصلانو چارو معاونيت اړوند د محصلانو د خدمتونو او همغږۍ آمريت له لوري جوړه شوې وه، د پنځهگونو پوهنځيو شاوخوا(۳۰۰) تنو محصلينو په کې نومليکنه کړې وه.
د پوهنتون عمومي رئيس الحاج مولوي عبدالواسع منصور د ازموينې له صحنې څخه د ليدنې پرمهال محصلينو ته د ازموينې د نظم ساتلو او ممتحنو استادانو ته په شفاف ډول د ازموينې اخيستلو او ژر تر ژره د پايلو د اعلان سپارښتنه وکړه. نوموړي همداراز د سيالۍ له تنظيموونکو څخه د مننې ترڅنگ، هغوی ته لارښوونه وکړه چې په راتلونکي کې هم د محصلينو فکري تنوير په موخه دې ته ورته نورې اصلاحي او رقابتي برنامې ترتيب او تنظيم کړي. د يادې سيالۍ د تنظيموونکو په وينا، چې دا ډول پروگرامونه د محصلينو لپاره د اسلامي ارزښتونو د لا ښه پېژندلو، د علمي کچې لوړاوي او د مطالعې فرهنگ د لا پياوړتيا په برخه کې گټور تمامېدای شي.
