سيد جمال الدين افغاني پوهنتون کې د سپورتي لوبو مېله پیل شوه
د واليبال، کرکټ او نورو بېلابېلو لوبو مېله، چې غبرگولي پر ۱۴ نېټه د پټۍ په پرېکولو سره پیل شوه؛ دوه مياشتې به دوام وکړي، پوهنتون د محصلانو چارو معاونيت په نوښت او د سپورت مرکزي کمېټې په هلوځلو يادې سيالۍ پلان شوې دي، چې د پوهنتون اړوند پوهنځيو لوبډلې په کې برخه لري.
د ياد پروگرام پرانیستې پر مهال د پوهنتون رييس شيخ عبدالمالک محسن د سپورت پر ارزښت او گټو خبرې وکړې او سپورتي فعالیتونه یې محصلینو د فزيکي او ذهني ودې لپاره مهم وبلل.
پوهنتون د سپورت مرکزي کمېټې مسؤل پوهنيار فريدالله صافي د پیل شویو سیالیو په اړه وویل، چې له دې سیالیو یې موخه محصلینو او ځوانانو ته د سالمې بوختیا رامنځته کول دي او لوبغاړو ته یې د سپورتي اخلاقو او اصولو د رعایت سپارښتنه وکړه.
د يادو سياليو په لومړۍ ورځ د واليبال ټورنمنټ پيل شو، چې په لومړۍ لوبه کې د ښوونې او روزنې پوهنځي لوبډلې د استادانو-اداري کارکوونکو لوبډلې ته 2/1 ماته ورکړه.
