له ښوونې او روزنې پوهنځي نږدې دوه سوه اویا تنه محصلين فارغ او د ټولنې خدمت ته وړاندې شول
سيد جمال الدين افغاني پوهنتون د ښوونې او روزنې پوهنځي د لېسانس په کچه تر لوړو زدهکړو وروسته(۲۶۹) تنه محصلين فارغ او ټولنې ته د خدمت په موخه وړاندې کړل.
په همدې مناسبت د پوهنتون تالار کې په جوړې شوې لويې پرتمنې غونډه کې د پوهنتون رييس شيخ عبدالمالک محسن، کونړ ولایت د علماوو شورا رييس شيخ عبدالقهار صديقي، د ياد پوهنتون مرستيالانو، د پوهنځيو رييسانو، کونړ ولايت د ځېنيو ادارو مشرانو او مېلمنو، د پوهنتون استادانو او اداري کارکوونکو، فارغېدونکو محصلينو او هغوی د کورنیو غړو گډون کړی ؤ.
غونډه د قرآن کريم د څو مبارکو آیاتونو پر تلاوت پیل شوه او ورپسې د ښوونې او روزنې پوهنځي رييس پوهنيار خليل الله حنيف د ښه راغلاست ترڅنگ؛ په پرانیستونکې وینا کې ياد پوهنځی د معارف د ابادۍ لپاره پُل وباله او همداراز يې فارغېدونکو محصلينو او د هغوی کورنيو ته مبارکي وويله.
غونډې ته د پوهنتون رييس شيخ عبدالمالک محسن وويل: د دې گڼو محصلينو فراغت موږ ته د هېواد د ابادۍ پيغام راکوي نو په کار ده چې دوی خپله حاصله کړې پوهه په پوره ایماندارۍ تر نورو ورسوي.
نوموړي په خپلو خبرو کې فارغېدونکو محصلينو او د دوی کورنيو ته مبارکي ورکړه او هغوی يې لا نورو لوړو زدهکړو ته وهڅول.
د کونړ ولایت علماوو شورا رييس شيخ عبدالقهار صديقي غونډې ته په خپله وينا کې لوستی ځوان د ټولنې مهم ضرورت وباله او فارغېدونکي محصلين يې مخاطب کړل چې پر خپلو وړتياوو باور وکړي او هېواد د ابادۍ معماران جوړ شي.
غونډې ته کونړ ولايت د محاکمو رييس مولوي عزيز الرحمن ياسر، د حج او اوقافو رييس الحاج مولوي محمد رحيم مذهبي، د پوهنې رييس مولوي محيب الله حيدري، د ښاري محکمې رييس مولوي محمد ايوب قلم او فارغېدونکو محصلينو د کورنيو په استازيتوب مولوي عبد البشير ذاهد هم ويناوې وکړې.
پای کې غونډه فارغانو ته د تصدیق پاڼو له وېش وروسته، پوهنتون د دعوت او ارشاد مبلغ مولوي عبيدالله نعماني له لوري په دُعايه کلماتو سره پای ته ورسېده.
