پوهنتون کې د سيرت النبي ﷺ سيالۍ گټونکي محصلين د يوې غونډې په ترڅ کې وستايل شول
ياده سيالي چې د سيد جمال الدين افغاني پوهنتون د محصلانو چارو معاونيت اړوند د محصلانو د خدمتونو او همغږۍ آمريت له لوري د پوهنتون فرهنگي کمېټې په همکارۍ جوړه شوې وه، په ازموينه کې يې د پنځهگونو پوهنځيو شاوخوا(۲۸۰) تنو محصلينو برخه اخيستې وه.
په همدې موخه جوړو شويو مراسمو کې د سيد جمال الدين افغاني پوهنتون د محصلانو چارو مرستيال، د پوهنځيو رئيسانو، استادانو او محصلينو برخه لرله. پيل کې د قرآن کريم د څو مبارکو آیاتونو تر تلاوت وروسته، د محصلانو چارو مرستيال مفتي شېرافضل منصور د غونډې گډونوالو ته د ښه راغلاست ترڅنگ؛ برياليو محصلينو ته مبارکي وويله او د سياليو له تنظيموونکو يې مننه وکړه. هغه زياته کړه چې په راتلونکي کې به د محصلينو د فکري روزنې په موخه دېته ورته نورې سيالۍ هم برابرې کړي. نوموړي وويل، چې د حضرت محمد ﷺ د مبارک سیرت په مطالعې سره د مسلمانانو يقين پخېږي او ايمانونه يې پياوړي کېږي او له همدې سره د دعوت په لار کې د ستونزو پر وړاندې زغم زده کوي.
ورپسې د شرعياتو پوهنځي رئيس مولوي سراج الدين عمر منصور غونډې ته وينا وکړه او ياده برنامه يې د محصلينو د فکري او اصلاحي روزنې لپاره گټور اقدام وباله. په پای کې د يادې سیالۍ مخکښو بریالیو محصلینو ته ډالۍ ورکړل شوې او غونډه د پوهنتون د دعوت او ارشاد آمر مولوي خليل الله معصوم له لوري په دُعايه کلماتو سره پای ته ورسېده.
