په نوې ودانۍ کې پوهنتون د عمومي کتابتون پرانيسته وشوه
د سيد جمال الدين افغاني پوهنتون د عمومي کتابتون لپاره د لازمو اسانتياوو په رامنځته کولو سره نوې ودانۍ ترميم او نن ورځ د کونړ ولايت د محترم والي صاحب له لوري د پوهنتون رهبرۍ او د نورو ولايتي ادارو د مسؤلينو په شتون کې د محصلينو او کتاب لوستونکو پر مخ پرانستل شوه.
د ياد پوهنتون عمومي کتابتون چې تردې وړاندې يې د يارګل بېلې په ساحه کې شتون درلود او اوس مهال د پوهنتون مرکزي ساحې سارباغ ته چې نوې ودانۍ ورته ترميم شوې را انتقال شو، چې نن ورځ د کونړ محترم والي مولوي قدرت الله ابوحمزه له لوري د دې پوهنتون عمومي رئيس الحاج مولوي عبدالواسع منصور، د عبدالله بن عباس ؓ ديني جامعې رئيس شيخ عبدالمالک نيازي، د کونړ ولايت اطلاعاتو او کلتور رئيس مولوي نجيب الله حنيف، د پوهنتون مرستيالانو، استادانو او اداري مسؤلينو په شتون کې رسماً د محصلينو او کتاب لوستونکو پر مخ پرانستل شو. د يادو مراسمو په ترڅ کې د مشرانو له لوري د ياد کتابتون د لاغني کېدو او پرمختيا ژمنې وشوې او همداراز د ستاينليکونو په ورکړې سره د هغو مسؤلينو د صادقانه هڅو او کوښښونونو قدرداني وشوه چې د دې کتابتون په برخه کې يې ترسره کړي ول. د يادونې وړ ده چې د پوهنتون مرکزي کتابتون په عموم کې دا مهال د لوستونکو استفادې لپاره په بېلوبېلو علومو کې شاوخوا پنځلس زره کتابونه لري، چې په منظم ډول ترې د پوهنتون استادان او محصلان استفاده کوي.
