پوهنتون د کرنې پوهنځي استادان چې د دوکتورا او ماسترۍ زدهکړو له بشپړولو وروسته هېواد ته راستانه شوي وو، د يوې غونډې په ترڅ کې وستايل شول
سيد جمال الدين افغاني پوهنتون کې د کرنې پوهنځي د يادو استادانو د فراغت او ښه راغلاست په ویاړ د کرنې پوهنځي د نشراتو او فرهنگي چارو کمېټې په هلو ځلو غونډه جوړه شوې وه چې په کې د پوهنتون رييس شيخ عبدالمالک محسن، د پوهنځيو رييسانو، د پوهنتون استادانو او محصلينو برخه لرله.
غونډې ته د پوهنتون رييس په خپلو خبرو کې د يادو استادانو راتگ د هېواد او پوهنتون د پرمختگ په برخه کې مهم گام ياد کړ او له راغلو استادانو سره يې د علمي څېړنو او تجربو په تطبيق کې د هر اړخيزې مرستې ژمنه وکړه.
نوموړي راستانه شوي استادان مخاطب کړل چې له زده علومو او تجروبو د راتلونکي نسل د روزنې په برخه کې کار واخلي او هېواد د ابادولو لپاره نه ستړې کېدونکې هلې ځلې وکړي.
کرنې پوهنځي رييس پوهندوی محمد حسن محمدي د خپلو خبرو پر مهال د راستانه شويو استادانو ستاينه او مننه وکړه، چې د دوکتورا او ماسترۍ تحصيلي سندونو په ترلاسه کولو له گڼو تجربو سره هېواد ته راستانه شول.
راستانه شويو استادانو هر يو: پوهنيار دوکتور احمد راتب شرافت، پوهنيار ضياء الرحمن حاتم او پوهنيار سيد رحمت الله سادات د خپلو تحصيلي دورو لاسته راوړنې، تجربې او خاطرې د غونډې له گډونوالو سره شريکې کړې.
هغوی زياته کړه چې وياړ لري د لوړو زدهکړو وزارت په چوکاټ کې خپلې دندې مخته وړي او همداراز يې د ياد وزارت او پوهنتون له مشرتابه مننه وکړه چې د تحصيل دا زمينه یې ورته برابره کړې وه.
د یادولو وړ ده چې د ناستې په پای کې يادو درې(۳) تنو استادانو ته د پوهنتون مشرتابه له لوري ډالۍ ورکړل شوې.
