کرنې پوهنځي محصلینو د پیل کړي علمي سفر په ترڅ کې له بېلابېلو سيمو څخه ليدنه وکړه
سید جمال الدین افغاني پوهنتون د کرنې پوهنځي محصلینو د خپل علمي سفر په ترڅ کې له بېلابېلو څېړنيزو مرکزونو، هارتیکلچري او ځنگلي نباتاتو او طبيعي سرچينو څخه لیدنې وکړې.
محصلینو کابل ته پر لار د لغمان ولایت چهاردهي سیمې اړوند د سمسور بڼ مختلفو نرسريو د نباتي تکثیر بېلابېلو مېتودونو او د روزنې تخنیکونو په اړه علمي او گټور معلومات په عملي بڼه ترلاسه کړل او همداراز يې کابل ته پر لار د سروبي ولسوالۍ اړوند له ريیس باغ څخه لیدنه هم وکړه او د ځنگلي ونو د اندازه گیرۍ په اړه ورته د لارښود استادانو له لوري گټور معلومات په عملي بڼه تشریح شول.
يادو محصلينو د کابل پوهنتون له کرنې پوهنځي څخه لیدنه وکړه چې د یاد پوهنځي له مختلفو لابراتوارونو، کرنیز ماشین الاتو، کتابتون، گلخانو، څېړنيز فارم او نورو اکاډمیکو فعالیتونو څخه کتنې ترسره کړې چې د اړوند مسؤلینو له لوري ورسره گټور معلومات شريک شول.
د دې ترڅنگ يې د کابل ژوبڼ، بابر باغ او قرغې بند څخه هم لېدنې وکړې چې په کابل ژوبڼ کې د ژوبڼ لارښود استاد له لوري محصلینو ته د ۱۰۰ ډوله بېلابېلو وحشي ژويو، مرغانو او کبانو د ژوند، ارزښت، د ساتنې او پالنې اصول، نسلگیرۍ او ورپېښو گواښونو په هکله په عملي ډول معلومات وړاندې شول او همداراز يې د کرنې، اوبو لگونې او مالدارۍ وزارت اړوند له څېړنيز مرکز(بادام باغ) څخه ليدنه وکړه او د ځنگلي او طبي نباتاتو د تکثير او توليد په اړه معلومات او په دې برخه کې د تر سره شويو څېړنو پايلې ورسره د نوموړي مرکز د متخصصينو له لوري شريکې شوې.
د يادونې ده چې تر دې وروسته به ياد محصلين د دې علمي سفر په ترڅ کې له ټاکل شوي پلان سره سم د باميان پوهنتون او د دې ولايت له بېلابېلو ساتل شويو او تفريحي سيمو څخه ليدنې ولري.
