تنوير د لوړو زدهکړو خصوصي مؤسسې چارې وارزول شوې
سيد جمال الدين افغاني پوهنتون د مشرتابه پلاوي په کونړ ولايت کې د تنوير لوړو زدهکړو خصوصي مؤسسې له چارو څخه څارنه او ارزونه وکړه. د ياد پوهنتون رييس شيخ عبدالمالک محسن چې د علمي چارو مرستیال قاضي عبدالهادي فضلي، د اقتصاد پوهنځي رييس پوهنيار حامد احمد مراد، د کيفيت لوړاوي آمر پوهنيار انتظار صديقي يې ملتيا کوله، د ياد خصوصي تحصيلي بنسټ د علمي، محصلانو، تدریسي او اداري چارو د ارزونې ترڅنگ؛ د نوموړې مؤسسې د مسؤلينو او محصلینو ستونزې واورېدې او هغوی ته يې د حل ډاډ ورکړ.
شيخ عبدالمالک محسن په تحصيلي نظام کې د خصوصي تحصيلي بنسټونه رول مهم وباله او د تنوير لوړو زدهکړو خصوصي مؤسسې رهبرۍ ته يې ډاډ ورکړ چې د سيد جمال الدين افغاني پوهنتون له دوی سره د ظرفيت لوړونې او علمي همکاريو په برخه کې مرستې ته چمتو دی. نوموړي د يادې مؤسسې مسؤلينو ته سپارښتنه وکړه چې د محصلينو مسلکي زدهکړو ترڅنگ؛ فکري او اصلاحي روزنې ته پوره پام وکړي.
د علمي چارو مرستیال قاضي عبدالهادي فضلي د اکاډميکو بنسټونو ترمنځ د اړيکو پر ارزښت، اهميت او اړتيا خبرې وکړې او په تحصيلي نظام کې يې د خصوصي سکتور باکيفيته ونډه مهمه ياده کړه. نوموړي څارنه او ارزونه د کارونو د لا ښهوالي، نوښتونو او پر مختگونو د شريکولو لپاره اړينه چاره وبلله.
د تنوير لوړو زدهکړو خصوصي مؤسسې رهبرۍ د سيد جمال الدين افغاني پوهنتون د مشرتابه پلاوي په ورتگ خوښي وښوده او د مؤسسې پر فعاليتونو يې رڼا واچوله.
ياده دې وي چې د سيد جمال الدين افغاني پوهنتون رهبري د يو منظم پلان له مخې په کونړ ولايت کې د تنوير لوړو زدهکړو خصوصي مؤسسې له فعاليتونو څخه څارنه کوي.
