د زراعت او اقتصاد پوهنځيو په جلا جلا غونډو کې خپل ممتاز محصلین وستايل او نويو محصلانو ته يې ښه راغلاست ووايه
سيد جمال الدين افغاني پوهنتون د زراعت او اقتصاد پوهنځيو خپلو ممتازو محصلینو لپاره د ستاينې او نويو محصليونو ته د ښه راغلاست غونډې جوړې کړې.
يادو مراسمو کې د پوهنتون علمي چارو مرستيال پوهندوی ميرويس ستانکزي، د محصلانو چارو مرستيال پوهنمل علي احمد بهار، د يادو پوهنځيو مشرتابه، استادانو او محصلانو برخه لرله.
د پوهنتون علمي مرستيال په خپلو خبرو کې ممتازو محصلينو ته مبارکي وويله او هغوی يې د تحصيلي ډگر اتلان وبلل.
نوموړي دا نوښت وستايه چې د ممتازو محصلينو د ستاينې او نويو محصليونو ته د ښه راغلاست غونډې يوځای ترتيب شوې دي او زياته يې کړه چې دا د نويو محصلينو هڅونې او د مثبت فکر ورکولو په برخه کې مهم رول لري.
د يادو پوهنځيو استادانو له لوري د پوهنتون او پوهنځيو تشکیلاتي جوړښت، پوهنتوني چاپېریال، د محصل مسؤلیتونو، نصاب، کرېديت لايحې، د ليليې مقررې، تاجیل، منفکۍ، نظم او دسپلين، ازموینو د ډولونو، کتابتون او نورو اړونډو موضوعاتو په اړه چمتو کړي پرېزنټېشنونه وړاندې شول.
يادې غونډې ممتازو محصلينو ته په ستاينليکونو ورکولو او دُعايه کليماتو سره پای ته ورسېدې.
