د پوهنتون اداري شورا ناسته وشوه
د سيد جمال الدين افغاني پوهنتون عمومي رئيس الحاج مولوي عبدالواسع منصور په مشرۍ تر سره شوې يادې ناسته کې چې د پوهنتون مرستيالانو، د پوهنځيو رئیسانو او آمرينو په کې برخه لرله، په پوهنتون کې د پوهنځيو او څانگو کتابتونونو، د ليليې اړوند ستونزو حل، د پوهنتون لپاره د نانوايي جوړېدو، په هيئتيو کې د مسلکي او متعهدو اشخاصو ټاکلو، د حفظ او مراقبت کړنلارې تاييد او نور بېلابېل موضوعات په کې بحث شول او په تړاو يې لازمې پرېکړې وشوې او همداراز د اړوندو چارو د لا ښه ترسراوي او چټکتيا په موخه ځانگړې کاري کمېټې هم وټاکل شوې.
د پوهنتون عمومي رئيس د خپلې وینا پر مهال د ښه راغلاست ترڅنگ، د يادو موضوعاتو په هکله مسؤلینو ته دندې وسپارلې او هغوی ته يې په اړوندو چارو کې د ښې همغږۍ او پوره همکارۍ سپارښتنه وکړه. نوموړي په خپلو خبرو کې اړوندو مسؤلینو ته له بیت المال څخه د سالمې او اصولي استفادې په برخه کې هراړخيزې لارښوونې وکړې. ياده ناسته چې د قرانکريم د څو مبارکو اياتونو په تلاوت سره پیل شوې وه، په دُعايه کلماتو سره پای ته ورسېده.
