سيد جمال الدين افغاني پوهنتون کې د علمي مقالې ليکنې د تدوين لارې چارې تر سرليک لاندې يو ورځنی علمي کنفرانس وړاندې شو
په همدې اړوند جوړه شوې غونډه کې د پوهنتون علمي چارو مرستيال پوهندوی ميرويس ستانکزي، د محصلانو چارو مرستيال پوهنمل علي احمد بهار، د علمي څېړنو او مجلې مرستيال پوهندوی دوکتور سيد اصغر هاشمي، د سيد جمال الدين افغاني پوهنتون او د نورستان لوړو زدهکړو مؤسسې استادانو برخه لرله.
پیل کې د پوهنتون علمي مرستيال پوهندوی ميرويس ستانکزي گډونوالو ته د ښه راغلاست ترڅنگ وويل: د اسلام مبارک دين پر تحقيق او څېړنه ټينگار کوي او عقل هم پر دې حکم کوي چې انسان بايد د ښه ژوندانه لپاره خپل چاپېريال برابر کړي؛ چې دا کار په تحقيق او څېړنې سره کېدای شي.
نوموړي په خپلو خبرو کې د ياد کنفرانس له تنظيموونکو مننه وکړه او زياته يې کړه چې د داسې علمي کنفرانسونو لړۍ به جاري وساتي.
د غونډې په ترڅ کې د سيد جمال الدين افغاني پوهنتون د علمي څېړنو او مجلې مرستيال پوهندوی دوکتور سيد اصغر هاشمي(په اجتماعي علومو کې د علمي مقالې ليکنې د تدوين لارې چارې) او د زراعت پوهنځي استاد پوهنمل دوکتور اتل حميدي(په طبيعي علومو کې د علمي مقالې ليکنې د تدوين لارې چارې) تر سرلیکونو لاندې خپلې علمي او څېړنيزې مقالې وړاندې کړې.
غونډه د خير په دُعاء سره پای ته ورسېده.
