له اقتصاد پوهنځي۹۲ تنه محصلين فارغ او ټولنې ته د خدمت په موخه وړاندې شول
سيد جمال الدين افغاني پوهنتون د اقتصاد پوهنځي له دوو څانگو څخه د لېسانس په کچه تر څلور کلنو مسلکي زدهکړو وروسته په نهمه دوره کې(۹۲) تنه محصلين فارغ او ټولنې ته د خدمت په موخه وړاندې شول.
په همدې موخه ترتيب شوې غونډه کې د پوهنتون عمومي رئيس الحاج مولوي عبدالواسع منصور، د پوهنتون مرستيالانو، د پوهنځيو رئيسانو، د پوهنتون استادانو، اداري کارکوونکو، فارغېدونکو محصلينو او د هغوی د کورنیو غړو برخه لرله.
غونډې ته د پوهنتون عمومي رئيس په خپلو خبرو کې فارغېدونکو محصلينو ته مبارکي وويله او زياته يې کړه، خوښ او خوشحاله يم او افتخار کوم چې نن ورځ په اسلامي روحيه او د اقتصاد په يو ډېر مهم مسلک کې روزل شوي کادرونه د ټولنې او نظام د خدمت لپاره وړاندې کوو. نوموړي فارغېدونکو محصلينو ته په خطاب کې وويل دا چې اقتصاد د ملک د پرمختگ مهم سبب دی نو د ولس هوساينې، اقتصادي پياوړتيا او ځانبسياينې لپاره کلک هوډ او قوي ژمنه وکړئ.
په غونډه کې د پوهنتون علمي مرستيال قاضي عبدالهادي فضلي، د محصلانو مرستيال مفتي شېر افضل منصور، د اقتصاد پوهنځي رئيس پوهنيار حامد احمد مراد او نورو ويناوالو په خپلو خبرو کې د علم ارزښت او اهميت بيان کړ او فارغېدونکي محصلين يې لا نورو لوړو زدهکړو ته وهڅول. په پای کې غونډه فارغانو ته د تصدیق پاڼو له وېش وروسته په دُعايه کلماتو سره پای ته ورسېده.
