لوړو زده کړو وزارت له طرفه د پوهنتون اداري کارکوونکو ته روزنیز ورکشاپ داير شو
سيدجمال الدين افغاني پوهنتون اداري کارکوونکو لپاره د لوړو زده کړو وزارت د بشري سرچینو ریاست د ښوونې او ظرفیت لوړونې آمریت له طرفه پنځه ورځنی روزنیز ورکشاپ داير شو.
د یاد ورکشاپ په پیل کې د سيدجمال الدين افغاني پوهنتون رييس پوهنمل محب الله محب د وزارت مقام او بشري سرچینو ریاست له توجه او همکارۍ څخه مننه وکړه او کارکوونکو ته یې د داسې ورکشاپونو دایرول ګټور وبلل، نوموړي زیاته کړه چې باید له دې فرصته په ښه توګه استفاده وشي.
ورپسې د لوړو زده کړو وزارت د بشري سرچینو ریاست د ظرفیت لوړونې آمر عبیدالله مولایي د ورکشاپ په اړه معلومات ورکړل، او ویې ويل چې په یاد ورکشاپ کې به د لوړو زده کړو وزارت د تشکیلاتي جوړښت، د اداري اسنادو مدیریت، اداري مهارتونو لوړولو، اداري مراسلاتو ترتیبول، پلان جوړونې او نورو مديريتي مهارتونو په اړه زده کړه ورکړل شي.
