محصلینو ته په ځان باور او اعتماد او د محصل ژمنليک په تړاو د پوهاوي سېمينار وړاندې شو
دغه يو ورځنی تشرېحي سېمينار چې د سيد جمال الدين افغاني پوهنتون د محصلانو چارو معاونيت تر چتر لاندې د محصلانو د خدمتونو او همغږۍ آمريت په نوښت داير شوی ؤ، د پنځهگونو پوهنځيو محصلينو په کې برخه لرله. په پيل کې د محصلانو چارو مرستيال مفتي شېرافضل منصور په خپلو خبرو کې د سېمينار اهميت او ارزښت بيان کړ او ورپسې د شرعياتو پوهنځي استاد پوهنيار محمدوسيم حبيبي له لوري د محصل ژمنليک په تړاو هر اړخيز معلومات وړاندې شول او ټولې برخې يې په تفصيلي ډول تشرېح کړې. تر نوموړي وروسته د ښوونې او روزنې پوهنځي استاد پوهنيار عبدالرحمن عابد له لوري په ځان باور او اعتماد، انگېزه پېژندنه، په ځان د باور او اعتماد پیاوړتيا او کمزورتيا لاملونه او په دې تړاو نور بېلابېل موضوعات بحث شول او همداراز يې د گډونوالو پوښتنې هم ځواب کړې.
