وزارت د څارنې او ارزونې رياست پلاوي د پوهنتون له مشرتابه سره وليدل
لوړو زده کړو وزارت د مشرتابه مقام د حکم پر بنسټ د ياد وزارت د څارنې او ارزونې رياست ټاکل شوي پلاوي د سيد جمال الدين افغاني پوهنتون له مشرتابه سره وليدل.
۴مه، جمادی الاول، ۱۴۴۵ هــ . ق
ټاکل شوې ده چې یاد پلاوي به کونړ ولايت ته د دې کاري سفر په ترڅ کې د پوهنتون له علمي، محصلانو او مالي او اداري چارو څخه څارنه وکړي او د ياد تحصيلي بنسټ د مشرتابه، استادانو او محصلینو ستونزې او وړاندیزونه به واوري او د حل په موخه به يې د وزارت له محترم مقام سره شریک کړي.
د سيد جمال الدين افغاني پوهنتون رييس پوهنمل محب الله محب راغلي پلاوي ته ښه راغلاست ووايه او ستونزو د حل په برخه کې يې له نوموړي پلاوي څخه د پوره همکارۍ غوښتنه وکړه، چې د هغوی له لوري هم ډاډ ورکړل شو.
د يادونې وړ ده چې دا پلاوی به له ټاکل شوي پلان سره سم د دې علمي بنسټ تحصیلي او اداري چارې هم وارزوي او پايلې به یې د لوړو زده کړو وزارت له محترم مشرتابه سره شريکې کړي.
