په کونړ ولايت کې د دیني مدارسو د عالمیې، عالیې او خامسې درجو کلنۍ ازموینه نن ورځ پای ته ورسېده

دغه ازموینه چې د لوړو زده کړو او پوهنې وزارتونو له لوري په گډه له تېرې شنبې ورځې را په دې خوا د شپږو ورځو پر دوام د کونړ په گډون د هېواد په ټولو ولايتونو کې هم‌مهال پيل شوې وه نن ورځ بې له کومې ستونزې په پوره اطمينان او بري سره پای ته ورسېده.

ممتحنه پلاوي د ازموینې پر مهال د گډونوالو له لوري د نظم په مراعتولو خوښي وښوده او هغوی ته يې د پوره شفافيت او روڼتيا ډاډ ورکړ.

په ياده ازموينه کې د کونړ ولايت امارتي او خصوصي دیني مدارسو (938) تنو چې (329) تنه یې د عالمیې، (281) تنه د عاليې او (328) تنه د خامسې درجو فارغ فاضلان او طالب العلمان وو، گډون کړی ؤ.

ټاکل شوې ده، چې د ځانگړې کړنلارې له مخې به د عالميې او عاليې درجو بريالیو فاضلانو ته تر رسالې ليکلو وروسته د لوړو زده کړو وزارت له خوا او خامسې دورې بريالیو طالب العلمانو ته به د پوهنې وزارت له لوري اسناد ورکړل شي.