په کونړ ولايت کې د دیني مدارسو د عالیې او عالمیې مرحلو کلنۍ ازموینه پیل شوه

ياده ازموینه نن ورځ د کونړ ولايت د سيد جمال الدين افغاني پوهنتون په انگړ کې د پوهنتون عمومي رئيس او د دې ازموينې د مديره هيئت مشر الحاج مولوي عبدالواسع منصور، د علماوو شورای او د جهادي مدرسې رئيس صاحبانو، له مرکز کابل څخه راغلو اعلی نگرانانو، نگران علماء کرامو او د فاضلانو په حضور کې رسماً پیل شوه. د پوهنتون عمومي رئيس الحاج مولوي عبدالواسع منصور په خپلو خبرو کې گډونوالو ته د ازموينې په اړه لازم معلومات ورکړل او هغوی ته يې د پوره نظم سپارښتنه وکړه.

د يادونې وړ ده چې دا ازموينه به د لوړو زده کړو وزارت د دیني جامعاتو او تخصصاتو لوی ریاست له لوري د ټول هېواد سربېره د کونړ ولايت د امارتي او خصوصي دیني مدارسو څخه له(650) تنو فاضلانو څخه چې(316) تنه يې د عاليې او(334) تنه یې د عالمیې مرحلو فارغ فاضلان دي؛ د شپږو ورځو په ترڅ کې له ټاکل شوي مهالوېش سره سمه واخېستل شي.