پوهنتون مشرتابه پلاوي د ښوونې او روزنې پوهنځي له تدریسي چارو څارنه وکړه
د سيد جمال الدين افغاني پوهنتون رييس شيخ عبدالمالک محسن؛ د علمي چارو مرستيال پوهندوی ميرويس ستانکزي او د محصلانو چارو مرستیال پوهنمل علي احمد بهار په ملتيا د ښوونې او روزنې پوهنځي تدریسي چارې له نږدې ولیدې چې د لیدنې پر مهال يې پوهنځي د مسؤلينو، استادانو او محصلینو ستونزې واورېدې او هغوی ته يې د حل ډاډ ورکړ.
د پوهنتون رييس استادانو ته د محصلينو سالمې فکري او اصلاحي روزنې او له کورس پاليسۍ سره سم د نصاب د تدريس په برخه کې او همداراز محصلينو ته د حاضرۍ پابندۍ، له وخت څخه د سالمې استفادې، د بیت المال ساتنې او سيرت او صورت د برابرولو په اړه لازمې لارښوونې او سپارښتنې وکړې.
د ښوونې او روزنې پوهنځي رييس پوهنيار مولوي خانزاده حنفي د پوهنتون مشرتابه پلاوي په ورتگ خوښي وښوده او هغوی ته يې د يادو لارښوونو او سپارښتنو د رعايت او پلي کولو ډاډ ورکړ.
ياد پلاوي د خپلې څارنې پر مهال د هغو استادانو هڅې هم وستايلې چې تدريسي چارې يې له ټولو اکاډميکو معيارونو سره سمې پر مخ وړې وې.
