پوهنتون مشرتابه پلاوي د کمپيوټرساينس پوهنځي له تدريسي او اداري چارو ليدنه او څارنه وکړه
سيد جمال الدين افغاني پوهنتون د علمي چارو مرستيال قاضي عبدالهادي فضلي او د علمي څېړنو او مجلې مرستيال پوهندوی دوکتور سيد اصغر هاشمي له پوهنځيو څخه د خپلو ليدنو پر دوام د کمپيوټرساينس پوهنځي تدريسي او اداري چارې وارزولې.
پيل کې د ياد پوهنځي رييس پوهنيار ذاکرالله عزام د پوهنځي د پرمختگونو، لاسته راوړنو، شته ستونزو او راتلونکو پلانونو په اړه پرېزنټیشن وړاندې کړ.
ورپسې د پوهنتون علمي چارو مرستيال په خپلو خبرو کې د کمپيوټرساينس پوهنځي په لاسته راوړنو خوښي وښوده او نوې ټکنالوژي يې د هېواد ځانبسياينې لپاره مهمه وبلله او په دې برخه کې يې د دې پوهنځي د استادانو هلې ځلې وستايلې.
پوهنتون د علمي څېړنو او مجلې مرستيال په خپلو خبرو کې د ياد پوهنځي استادان مخاطب کړل چې په خپلو څېړنو کې د ټولنې غوښتنې په پام ونيسي، ترڅو په دې برخه کې شته ستونزې راکمې شي.
پوهنتون مشرتابه پلاوي د خپلې ليدنې پرمهال د نوموړي پوهنځي له بېلابېلو برخو څخه ليدنه وکړه او ستونزو د حل ډاډ يې وکړ.
