پوهنتون کې د اعتبار ساتنې په موخه د کیفیت لوړاوي او اعتبار ورکولو پروسې د معیارونو د تشریح ۳ ورځنی ښوونيز ورکشاپ پای ته ورسېد
یاد ورکشاپ چې د لوړو زدهکړو وزارت د کیفیت د لوړاوي او اعتبار ورکولو ریاست له لوري د دې پوهنتون په معلوماتي ټکنالوژۍ مرکز کې د پوهنتون رهبرۍ غړو، پوهنځیو ريیسانو، دیپارتمنتونو آمرينو، د مستقلو آمریتونو مسؤلینو او د تنوير لوړو زدهکړو خصوصي مؤسسې مسؤلينو ته دایر شوی ؤ، نن ورځ پای ته ورسېد.
ورکشاپ د پای په مراسمو کې د سيد جمال الدين افغاني پوهنتون ريیس شیخ عبدالمالک محسن په خپلو خبرو کې د یاد ورکشاپ د جوړېدو له کبله د لوړو زدهکړو وزارت، د کیفیت د لوړاوي او اعتبار ورکولو ریاست او له روزونکو استادانو مننه وکړه. نوموړي د ورکشاپ گډونوالو ته سپارښتنه وکړه چې له موادو يې په علمي او اداري چارو کې پوره استفادې وکړي.
د يادونې ده چې د شيخ زايد پوهنتون استاد پوهنمل دوکتور قدرت الله ځواک او د پکتيا پوهنتون استاد پوهنمل محمد امین احمدزي د دې ورکشاپ د روزنې چارې مخته يوړې. ياد ورکشاپ د گډونوالو د پوښتنو په ځوابولو او دُعايه کليماتو سره پای ته ورسېد.
