کونړ ولایت کې د دیني مدارسو د عالمیې او عالیې مرحلو د کلنۍ ازموینې درېیمه ورځ په بريالۍ توگه پای ته ورسېده
ياده ازموينه چې د سيد جمال الدين افغاني پوهنتون په انگړ کې د شپږو ورځو په ترڅ کې اخيستل کېږي، د دې پوهنتون د رييس شيخ عبدالمالک محسن، د محصلانو چارو مرستیال پوهنمل علي احمد بهار، د ولايت مقام استازي مولوي ميرولي حقاني، لوړو زده کړو وزارت له دیني جامعاتو او تخصصاتو لوی ریاست څخه د راغلي پلاوي او نگران علماء کرامو تر مستقيمې څارنې لاندې پر ټاکلي وخت پيل او په بريالۍ توگه يې درېيمه ورځ پای ته ورسېده.
د ازموينې په پيل کې د پوهنتون رييس فاضلانو ته د نظم او اصولو مراعتولو سپارښتنه او په ازموينه کې د بري دُعا وکړه.
دغه ازموینه چې د لوړو زده کړو وزارت له لوري د کونړ په گډون په ۳۱ ولايتونو کې هم مهال پيل شوې، د دې ولایت له امارتي او خصوصي دیني مدارسو څخه د عالمیې او عالیې مرحلو نږدې پېنځه سوه تنه فارغ شوي فاضلان په کې برخه لري، چې تر راتلونکې پنجشنبې ورځې به دوام وکړي.
