په سيد جمال الدين افغاني پوهنتون کې د نيالگيو کېنولو کمپاين پيل شو

ياد کمپاين چې(طبيعت د نباتاتو په کېنولو سره وساتئ) تر شعار لاندې د مالي او اداري چارو معاونيت په چوکات کې د چاپېريال ساتنې عمومي کمېټې او د تهيې، تدارکاتو او خدماتو آمريت اړوند د حفظ او مراقبت مديريت په گډو هڅو د نږدې(۱۲۰۰) نيالگيو په کېنولو سره پيل شو، چې نن ورځ يې د پوهنتون عمومي رئيس، مرستيالانو، د پوهنځيو رئيسانو او نورو مسؤلينو له لوري رسماً پرانيسته وشوه.

کمپاين د پرانيستې پر مهال د پوهنتون عمومي رئيس الحاج عبدالواسع منصور د نیالگيو کښېنولو په ارزښت او اهميت خبرې وکړې او هغه يې دوامداره صدقه وبلله او زياته يې کړه، چې د چاپېريال ښکلا، سمسورتيا او خونديتوب د ټولو شريک مسؤليت دی نو د دې لپاره بايد نيالگي کېنوو او دوامداره ساتنه او پالنه يې وکړو. نوموړي په خپلو خبرو کې د کونړ ولايت د کرنې، اوبولگونې او مالدارۍ رياست د نيالگيو له مرستې کولو او د پوهنتون اړوندو مسؤلينو او په کمپاين کې له بوختو کارگرانو او محصلينو څخه مننه وکړه، چې پوهنتون د ښېرازۍ لپاره هلې ځلې کوي. ورپسې د نيالگيو کېنولو کمپاين رسماً پيل شو او د پوهنتون رهبرۍ، مسؤلينو او محصلينو له لوري په ټاکل شويو ځايونو کې نيالگي نهال شول.