سید جمال الدین افغاني پوهنتون ته نوی رئيس معرفي شو
د عاليقدر اميرالمؤمنين حفظه الله تعالی ورعاه د ځانگړي حکم پر اساس الحاج مولوي عبدالواسع منصور چې د سید جمال الدین افغاني پوهنتون د نوي رئیس په توگه ټاکل شوی ؤ چې نن ورځ د يوې پرتمنې غونډې په ترڅ کې د پوهنتون منصوبينو ته ور وپېژندل شو.
هغه غونډه چې د سید جمال الدین افغاني پوهنتون په تالار کې رابلل شوې وه، په کې د کونړ ولایت علماوو شورا رئيس شيخ عبدالقهار صديقي، د ياد پوهنتون مخکېني رئيس شيخ عبدالمالک محسن، د کونړ ولایت جیدو علماء کرامو، د ولايتي ادارو مسؤلينو او مېلمنو، د پوهنتون مرستيالانو، د پوهنځيو رئیسانو، استادانو، اداري کارکوونکو او محصلينو گډون کړی ؤ.
پيل کې د قرآنکريم د څو مبارکو آياتونو له تلاوت وروسته د پوهنتون علمي چارو مرستيال قاضي عبدالهادي فضلي راغلو مېلمنو ته ښه راغلاست ووايه او په اسلامي نظام کې يې د مسؤليت او اطاعت پر اهميت او ارزښت خبرې وکړې.
غونډې ته شیخ عبدالقهار صديقي په خپلو خبرو کې د مخکېني رئيس د خدمتونو ستاينه وکړه او د پوهنتون منصوبينو ته يې لارښوونه وکړه چې له نوي رئيس سره په اړوندو چارو کې پوره همکاري او په شرعي لحاظ يې کامل اطاعت وکړي. ورپسې د کونړ ولايت مقام د کارکوونکو چارو آمر مولوي ميرولي حقاني د مشرتابه عالي مقام هغه حکم ولوست چې پر اساس يې الحاج مولوي عبدالواسع منصور د سید جمال الدین افغاني پوهنتون د رئيس په توگه ټاکل شوی ؤ. ورپسې د ياد پوهنتون مخکېني رئيس شيخ عبدالمالک محسن په خپلو خبرو کې په اسلامي نظام کې مسؤليت امتياز نه بلکې، يو دروند بار ياد کړ او د پوهنتون مسؤلينو ته يې له نوي رئيس سره د مخلصانه همکارۍ سپارښتنه وکړه.
د سید جمال الدین افغاني پوهنتون نوي رئیس الحاج مولوي عبدالواسع منصور غونډې ته په خپلو ويناوو کې د افغانستان اسلامي امارت پاليسي تشرېح کړه او اطاعت يې د نظام د بقاء او استحکام لپاره اساسي شرط وباله. نوموړي په پوهنتون کې د تضمين کيفيت معيارونو پر پلي کېدو ټينگار وکړ او دا معيارونو يې د پوهنتونونو د پرمختگ لپاره اساسي اصول ياد کړل او همداراز يې له خپلو راتلونکو پلانونو لنډه يادونه وکړه. ياده ناسته د کاپيسا ولايت د محاکمو رئيس مولوي عزيزالرحمن حقاني له لوري په دُعاء ویلو سره پای ته ورسېده.
