د زراعت پوهنځي محصلينو ته د ډينگي تبې ناروغۍ په تړاو د پوهاوي سېمينار وړاندې شو
د سيد جمال الدين افغاني پوهنتون د زراعت پوهنځي محصلينو ته د مالي او اداري چارو معاونيت په چوکاټ کې، د روغتيا او خونديتوب عمومي کمېټې په نوښت د ډينگي تبې ناروغۍ په تړاو معلوماتي سېمينار وړاندې شو.
دغه سېمينار چې د زراعت پوهنځي د حيواني علومو څانگې استاد پوهنمل ضیاءالدین ضیاء له لوري ارايه شو، محصلينو ته يې د ډينگي تبې ناروغۍ عمومي پېژندنې، د انتقال لارې او صحي تدابير، نښې او نښانې او همداراز د تشخيص او درملنې په تړاو تفصيلي معلومات وړاندې کړل. نوموړي د چاپېريال پر پاکوالي ټينگار وکړ او د غوماشو ځالې ختمول يې د يادې ناروغۍ په مخنيوي کې مهم وبلل او همداراز يې د محصلينو پوښتنې هم ځواب کړې.
د يادونې وړ ده چې گډونوالو محصلينو د سېمينار پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه. هېره دې نه وي چې په ياد پوهنتون کې تر دې وړاندې هم دې ته ورته علمي او معلوماتي سېمينارونه او کنفرانسونه داير شوي او په راتلونکي کې به هم دا لړۍ دوام ولري.
