پوهنتون استادانو ته د کمپیوټر زدهکړې ښوونیز پروگرام پيل شو
دغه زدهکړهییز پروگرام د سيد جمال الدين افغاني پوهنتون د مسلکي پرمختيايي مرکز په نوښت د څلورو مياشتو پر دوام د دې پوهنتون استادانو ته د کمپیوټري پوهې د لا لوړونې په موخه پیل شو.
د دغه پروگرام په پرانيسته کې د سيدجمال الدين افغاني پوهنتون رييس شيخ عبدالمالک محسن د نوموړي آمريت له مسؤلينو مننه وکړه او یاده برنامه يې د نوي عصر مهمه غوښتنه او جدي اړتيا وبلله او له ټولو گډونوالو یې وغوښتل چې له دې فرصت څخه د خپلې مسلکي پوهې او وړتیا په لوړونه کې اعظمي گټه واخلي.
د پوهنتون علمي چارو مرستيال پوهندوی ميرويس ستانکزي د ورکشاپ اهميت او ارزښت په اړه خبرې وکړې او له ټولو گډونوالو یې وغوښتل چې له انساني يون سره بايد يوځای مزل وکړي او د وخت له شرايطو سره ځان برابر کړي.
د پوهنتون مسلکي پرمختيايي مرکز آمر پوهنيار امان الله توتاخېل په خپلو خبرو کې د ياد ورکشاپ په اړه معلومات ورکړل او د نوموړي مرکز له لاسته راوړنو او راتلونکو پلانونو يې يادونه وکړه.
ياده دې وي، چې د دې روزنيز پروگرام ښوونيزې چارې به د کمپيوټرساينس پوهنځي استاد پوهنيار خالد شينواري له لوري د اونۍ په دوه ورځو کې د څلورو مياشتو پر دوام پر مخ وړل کېږي.
