له ښوونې او روزنې پوهنځي ۲۱۲ تنه محصلين فارغ او ټولنې ته د خدمت په موخه وړاندې شول
سيد جمال الدين افغاني پوهنتون د ښوونې او روزنې پوهنځي له اتو بېلابېلو ديپارتمنتونو څخه د لېسانس په کچه تر څلور کلنو مسلکي او تخصصي زدهکړو وروسته په دولسمه دوره کې(۲۱۲) تنه محصلين فارغ او ټولنې ته د خدمت په موخه وړاندې شول.
په همدې مناسبت د پوهنتون تالار کې په جوړې شوې لويې پرتمنې غونډه کې د پوهنتون رييس شيخ عبدالمالک محسن، د پوهنتون مرستيالانو، د پوهنځيو رييسانو، کونړ ولايت د ځېنيو ادارو مشرانو او مېلمنو، د پوهنتون استادانو او اداري کارکوونکو، فارغېدونکو محصلينو او هغوی د کورنیو غړو گډون کړی ؤ.
غونډه د قرآن کريم د څو مبارکو آیاتونو پر تلاوت پیل شوه او ورپسې د ښوونې او روزنې پوهنځي مرستيال پوهندوی عبدالعظيم صديقمل د ښه راغلاست ترڅنگ؛ فارغېدونکو محصلينو او د هغوی کورنيو ته مبارکي وويله.
غونډې ته د پوهنتون رييس شيخ عبدالمالک محسن وويل، چې د دې گڼو محصلينو فراغت موږ ته د هېواد د ابادۍ پيغام راکوي نو په کار ده چې دوی خپله حاصله کړې پوهه په پوره ایماندارۍ تر نورو ورسوي.
نوموړي په خپلو خبرو کې د نظام او په ځانگړي ډول د لوړو زدهکړو وزارت له وروستيو لاستهراوړنو يادونه وکړه چې له امله يې په تحصيلي ډگر کې د تېر پرتله د پاموړ ښهوالی راغلی دی.
غونډې ته د کونړ ولايت د امر بالمعروف، نهی عن المنکر او شکايتونو اورېدلو رييس مفتي محمد ياسين حقپرست، فارغېدونکو محصلينو د کورنيو په استازۍ حاجي محمودشاه او د محصلينو په استازيتوب ذبيح الله حيدري هم ويناوې وکړې. پای کې غونډه فارغانو ته د تصدیق پاڼو له وېش وروسته په دُعايه کلماتو سره پای ته ورسېده.
