د کرنې پوهنځي محصلينو علمي سفر پای ته ورسېد

داچې علمي سفرونه د بېلابېلو سيمو د خلکو د کلتورونو او افکارو تبادلې او مسلکي پوهې زیاتوالي په برخه کې ډېر مهم دي نو د ياد پوهنتون کرنې پوهنځي د ځنگلپوهنې او طبيعي منابعو ديپارتمنت ۲۶ تنو محصلینو چې د ۴ تنو استادانو په لارښوونه يې د کابل او باميان ولايتونو ته علمي سفر پیل کړی ؤ تېره ورځ پای ته ورسېد.

په دې علمي سفر کې محصلينو د کابل پوهنتون له کرنې پوهنځي، د کابل ژوبڼ، بادام باغ، قرغې بند، باميانو ته پر لار د پروان ولايت له گل غونډۍ، شېبر درې له نباتي پوښښ او وحشي ژویو، بند آمير، د باميان پوهنتون له کرنې پوهنځي، کاپيسا ولايت له باغونو او مصنوعي ځنگلونو، نغلو بند او له نورو بېلابېلو ساتل شويو سېمو، څېړنيزو مرکزونو او طبيعي سرچينو څخه لیدنې لرلې او د خپلو کوربنو په مرسته او د ياد پوهنځي د استادانو په لارښوونه يې عملي او چاپېريالي مشاهدې وکړې.

د يادونې وړ ده چې په دې علمي سفر کې د کابل او باميان پوهنتونونو له اړوندو مسؤلينو سره بېلابېلې ناستې هم وشوې چې په گډو همکاریو، ترسره شویو مسلکي فعالیتونو او راتلونکو پروگرامونو په اړه په کې بحث او خبرې وشوې.