سيد جمال الدين افغاني پوهنتون کې د سيرت النبي ﷺ تر سرليک لاندې يو ورځنی علمي سېمينار وړاندې شو
ياد سېمينار چې د محصلانو چارو معاونيت په نوښت جوړ شوی ؤ په کې د پوهنتون علمي چارو مرستيال پوهندوی ميرويس ستانکزي، د محصلانو چارو مرستيال پوهنمل علي احمد بهار، د مالي او اداري چارو مرستيال قاري رحمن الله صادق، د پوهنځیو رييسانو، استادانو، اداري کارکوونکو او محصلينو برخه لرله.
پیل کې د پوهنتون علمي مرستيال پوهندوی ميرويس ستانکزي گډونوالو ته د ښه راغلاست ترڅنگ وويل: د مسلمان په توگه پر موږ ټولو لازمه ده، د خپل خوږ نبي ﷺ د ژوندانه په اړه پوره معلومات ولرو، چې دا پر اسلام مبارک دين او قران کريم حقيقي پوهېدنه ده.
نوموړي په خپلو خبرو کې د ياد سېمينار له تنظيموونکو مننه وکړه او زياته يې کړه چې د داسې علمي سېمينارونو لړۍ به جاري وساتي.
د غونډې په ترڅ کې د سيد جمال الدين افغاني پوهنتون استادانو هر یو: پوهندوی عطاءالله عصامي(له بعثت څخه مخکې د رسول الله ﷺ ژوند)، پوهنمل نورالحق حليمي(له بعثت څخه وروسته تر هجرته د رسول الله ﷺ ژوند) او پوهنيار خانزاده حنفي(له هجرت څخه وروسته د رسول الله ﷺ ژوند)؛ تر سرلیکونو لاندې خپلې علمي او څېړنيزې مقالې وړاندې کړې.
په پای کې غونډه د شرعياتو پوهنځي رييس مولوي عبدالمنان عارف له لوري په دُعاء سره پای ته ورسېده.
