لوړو زدهکړو وزارت د استازي له لوري د سيد جمال الدين افغاني پوهنتون مشرتابه ته شا او خوا(۳۰۰) ټوکه کتابونه وسپارل شول
ياد وزارت د تاليف،څېړنې او ژباړې ريیس دوکتور حميدالله مزمل لهخوا د سيد جمال الدين افغاني پوهنتون ريیس شيخ عبدالمالک محسن ته شا او خوا(۳۰۰) ټوکه بېلابېل کتابونه د یوې غونډې په ترڅ کې وسپارل شول، چې په مراسمو کې يې د پوهنتون مرستيالانو، د پوهنځيو رييسانو، استادانو او اداري کارکوونکو برخه لرله.
پیل کې د پوهنتون رييس راغلي پلاوي ته ښه راغلاست ووايه او له هغوی یې مننه وکړه، چې د سيد جمال الدين افغاني پوهنتون ته يې یاد کتابونه ډالۍ کړل.
شيخ عبدالمالک محسن وويل: د الله ﷻ له لوري انسان ته ستره ډالۍ علم دی چې په کتاب ليکلو او خپرولو سره ساتل کېدای شي، نوموړي د څېړنې اهميت ته په اشارې د هرې ستونزې حل په تحقيق کې نغښتی وباله.
غونډې ته د تاليف،څېړنې او ژباړې ريیس د کتاب پر ارزښت مفصلې خبرې وکړې او په نړۍواله کچه يې کتاب د چاپ، مطالعې او پلور په برخه کې معلومات وړاندې کړل.
دوکتور حمیدالله مزمل استادانو ته د اصولو په رڼا کې د څېړنو ترسره کولو سپارښتنه وکړه او ژمنه يې وکړه چې له دې پوهنتون سره به په ياده برخه کې پوره همکاري وکړي.
همدا راز غونډې ته د پوهنتون علمي څېړنو او مجلې مرستيال پوهندوی دوکتور سيد اصغر هاشمي د سيد جمال الدين افغاني پوهنتون په کچه د څېړنو په برخه کې د لاسته راوړنو، ستونزو او حل لارو په اړه چمتو کړی پرېزېنټيشن وړاندې کړ.
یاده دې وي، چې مرسته شوي کتابونه به د پوهنتون په عمومي کتابتون کې ځای پر ځای شي؛ استادان او محصلین به ترې گټه واخلي.
