پوهنتون د یوې غونډې په ترڅ کې هغه استادان وستايل چې په داخلي ملي او نړیوالو کنفراسونو کې یې علمي- څېړنيزې مقالې لیکلي دي
سيد جمال الدين افغاني پوهنتون د علمي څېړنې او مجلې معاونیت له لوري د دې پوهنتون د ټولو پوهنځيو ۲۸ تنه هغه استادان او د علمي کادر غړي چې په داخلي ملي او نړيوالو کنفرانسونو کې یې علمي مقالې او څېړنې خپرې کړې وې او همدا راز يې د افغان نړیوال اسلامي پوهنتون په ملي کنفرانس کې د سید جمال الدین افغاني پوهنتون ته د لومړي مقام وياړ خپل کړی ؤ، د يوې غونډې په ترڅ کې وستايل شول.
په همدې مناسبت د پوهنتون د غونډو په تالار کې ستاينغونډه جوړه شوې وه چې په کې د سید جمال الدین افغاني پوهنتون رييس، د پوهنتون مرستيالانو، د پوهنځيو رييسانو، استادانو، اداري کارمندانو او محصلينو برخه لرله.
غونډې ته د سيد جمال الدين افغاني پوهنتون ريیس شیخ عبدالمالک محسن په خپلو خبرو کې وويل چې د هر هېواد پرمختگ په پوهې پورې تړلی، پوهنتونونه د علم مرکزونه او استادان يې د پوهې خاوندان دي، نو د لوړو زدهکړو وزارت او پوهنتونونو دوی ته دا زمينه برابره کړې ده چې څېړنې وکړي او د ټولنې ستونزو ته د حل لارې چارې ولټوي.
نوموړي د دې پوهنتون د هغو استادانو له خدمتونو مننه او ستاينه وکړه چې په نړيوالو او ملي کنفراسونو کې يې مقالې خپرې او وړاندې کړي او په ځانگړي ډول د افغان نړیوال اسلامي پوهنتون په ملي کنفرانس کې يې د مقالو د شمېر او محتوا له مخې د سید جمال الدین افغاني پوهنتون ته د لومړي مقام وياړ وربخښلی دی.
ورپسې د علمي چارو مرستيال قاضي عبدالهادي فضلي د علم ارزښت او د څېړنې اهميت په تړاو خبرې وکړې او استادن يې د پوهې تخليق او تحرير ته را وبلل.
غونډې ته د علمي څېړنو او مجلې مرستيال پوهندوی دوکتور سيد اصغر هاشمي په خپلو خبرو کې څېړنه د پوهې د انتقال مهمه وسيله وبلله او همدا راز يې د ياد معاونيت له لاسته راوړونو، پرمختگونو او راتلونکو پلانونو يادونه وکړه. نوموړي زياته کړه چې د دې پوهنتون د استادانو هغه مقالې چې په نړيوالو معتبرو ژورنالونو کې خپرې شوي په دوه ټوکو(طبيعي علوم او اجتماعي علوم) کې چاپ کړي دي.
د ستایل شویو استادانو په استازۍ د اقتصاد پوهنځي رييس پوهنيار حامد احمد مراد د پوهنتون مشرتابه له ملاتړ او هڅونې څخه د مننې تر څنگ په راتلونکي کې د لا غوره څېړنيزو فعاليتونو د ترسراوي ژمنه وکړه.
غونډه د پوهنتون مشرتابه او نورو مشرانو له لوري استادانو ته د ستاینلیکونو په ورکړې او شرعياتو پوهنځي د رييس مولوي عبدالمنان عارف له لوري په دُعايه کلماتو سره پای ته ورسېده.
