د پوهنتون عمومي رئيس په مشرۍ د علمي شورا فوق العاده ناسته وشوه
ياده ناسته چې د سيد جمال الدين افغاني پوهنتون عمومي رئيس الحاج مولوي عبدالواسع منصور په مشرۍ وشوه، د پوهنتون مرستیالانو، د پوهنځيو رئیسانو او استادانو په کې برخه لرله؛ چې د پوهنتون معاونيتونو او پوهنځيو د ۱۴۰۴ کال درېيمې ربعې راپورونو تائيد، له سرد سير څخه گرمسير ته د پوهنتون تحصيلي تقويم په بدلېدو سره راتلونکي بهاري سمستر ته د چمتووالي او يو شمېر نورو موضوعاتو په اړه يې بحث او پرېکړې وکړې.
د پوهنتون عمومي رئيس د پرانیستې وینا پر مهال په اسلامي شريعت کې د شورا پر مقام، ارزښت او اهميت هر اړخيزې خبرې وکړې او اړوند مسؤلين يې خپلو دندو ته ځیر کړل. ورپسې د پوهنتون مرستيالانو او د پوهنځيو رئیسانو د ۱۴۰۴ کال درېيمې ربعې راپورونه له شورا سره شريک کړل، چې د يو لړ اصلاحاتو وروسته تائيد شول. ياده ناسته چې د قرانکريم د څو مبارکو اياتونو پر تلاوت پیل شوې وه، په دُعايه کلماتو سره پای ته ورسېده.
