د پوهنتون عمومي رئيس په لارښوونه د پوهنځيو د تېرو فعالیتونو او راتلونکو پلانونو په تړاو د تشرېحي غونډو په لړ کې نن ورځ د کمپيوټرساينس پوهنځي رئيس له لوري معلوماتي پرېزنټېشن وړاندې شو
د سید جمال الدین افغاني پوهنتون عمومي رئيس الحاج مولوي عبدالواسع منصور د علمي او اداري چارو د لاښه پرمختگ او مؤثرې پلان جوړونې په موخه د پوهنځيو رئيسانو ته ځانگړې لارښوونه کړې، چې د تېر کال د فعالیتونو راپورونه او د راتلونکي کال لپاره تفصیلي پلانونه د يوې غونډې په ترڅ کې له اړوندو برخو سره شريک کړي. د يادو لارښوونو په رڼا کې نن ورځ د کمپيوټرساينس پوهنځي رئيس پوهنيار ذاکرالله عزام د تېرو علمي او اداري فعاليتونو او د راتلونکو عادي او انکشافي پلانونو په اړه خپل چمتو کړی پرېزنټېشن وړاندې کړ.
د پوهنتون عمومي رئيس په خپلو خبرو کې د ياد پوهنځي په لاسته راوړنو خوښي وښوده او د راتلونکو پلانونو په برخه کې يې لازمې سپارښتنې او لارښوونې ورسره شريکې کړې. نوموړي وويل، چې له دې چارې مو هدف د هر پوهنځي فعالیتونه له نږدې کتل دي، چې په گډه سره وکړای شو د کیفیت لوړوالي په برخه کې پر خپل وخت کوټلي گامونه واخلو.
ټاکل شوې ده چې د يادو لارښوونو پر بنسټ به د هر پوهنځي رئيس په خپل وار د تېرو فعالیتونو او راتلونکو پلانونو په تړاو دې ته ورته تشرېحي غونډې دايرې کړي، چې د پوهنځیو تېر فعالیتونه به په کې وړاندې او راتلونکي پلانونه به يې وڅېړل شي.
