پوهنتون کې جديدالشمول محصلانو ته د ښه راغلاست غونډو لړۍ پيل شوه
د يادې لړۍ په پيل کې نن ورځ د سيد جمال الدين افغاني پوهنتون د شرعياتو پوهنځي خپلو نويو شامل شويو محصلينو ته د ښه راغلاست او د پوهنتون له چاپېريال سره د پېژندگلوۍ غونډه جوړه کړه، چې په کې د پوهنتون د محصلانو چارو مرستيال، د شرعياتو پوهنځي رييس، د دعوت او ارشاد آمر، د ياد پوهنځي استادانو او محصلينو برخه لرله.
غونډې ته د ويناوو په لړ کې د محصلانو چارو مرستيال مفتي شېرافضل منصور، د شرعياتو پوهنځي رييس مولوي سراج الدين عمر منصور او د دعوت او ارشاد آمر مولوي اعجازالحق زلِف؛ جديدالشمول محصلينو ته د لازمو توصيو او لارښوونو سربېره د علم پر ارزښت او اهميت تفصيلي خبرې وکړې. ورپسې د ياد پوهنځي استاد پوهنمل سيدرضاءالله جلالي د پوهنتوني چاپېریال، د پوهنځي تشکیلاتي جوړښت، د محصل مسؤلیتونو، نصاب، کرېديت لايحې، نظم او دسپلين، ازموینو د ډولونو او نورو اړوندو موضوعاتو په اړه چمتو کړي معلومات وړاندې کړل.
د يادونې ده چې د دې پوهنتون اړوند نور پوهنځي به هم له ټاکل شوي مهالوېش سره سم خپلو نويو شامل شويو محصلينو ته د ښه راغلاست او پوهنتوني چاپېريال سره د پېژندگلوۍ غونډې دايرې کړي. هېره دې نه وي چې په سږ کال کانکور ازموينه کې د سيد جمال الدين افغاني پوهنتون اړوند پنځهگونو پوهنځيو ته نږدې(۱۰۷۰) تنه محصلين بريالي شوي دي.
