د روان پسرلني سمستر پيل شوې نهايي ازموينې په عادي ډول روانې دي
يادې ازموينې چې د روانې جوزا مياشتې پر ۱۱مه نېټه پيل شوې، له ټاکل شوي مهالوېش سره سمې په منظم او شفاف ډول روانې دي. د سيد جمال الدين افغاني پوهنتون عمومي رئيس الحاج مولوي عبدالواسع منصور د ازموينو له صحنو څخه د ليدنې او څارنې په ترڅ کې د اړوندو مسؤلينو او استادانو ته سپارښتنه وکړه چې ازموينې دې د لوړو زدهکړو وزارت له اصولو او مقرراتو سره سمې په پوره شفافيت سره واخلي او پايلې دې پر خپل وخت له محصلينو سره شريکې کړي.
بل لور ته محصلينو د ازموينو له روان بهير څخه خوښي وښوده او ويې ويل چې د ازموينو لپاره د کافي وخت ځانگړي کولو سربېره مناسب چاپېريال برابر شوی او ټولې چارې د ټاکل شويو اصولو له مخې پر مخ وړل کېږي.
تر يادې څارنې وروسته د پوهنتون عمومي رئيس د ازموينو هيئت سره په ناسته کې د ازموينو پر لا ښه تنظيم، پوره شفافيت او د نافذه اصولو پر پلي کېدو ټينگار وکړ او همدا راز يې د ازموينو د بريالي مديريت په برخه کې د هيئت ترسره کړې هڅې وستايلې. د دغې ناستې په ترڅ کې ياد هيئت د پوهنتون مشرتابه ته ډاډ ورکړ، چې د روانو ازموينو تر پايه به له ټولو صحنو څخه په دوامدار ډول څارنه کوي او راپورونه به يې پر خپل وخت د پوهنتون رهبرۍ سره شريک کېږي.
