د سيد جمال الدين افغاني او ننگرهار پوهنتونونو ترمنځ د گډو علمي همکاريو هوکړهليک لاسليک شو
هغه ناسته چې د ياد هوکړهليک د لاسليک په موخه په ننگرهار پوهنتون کې ترتيب شوې وه، چې د ننگرهار پوهنتون عمومي رئيس شيخ انعام الله مدني او د سيد جمال الدين افغاني پوهنتون د علمي چارو مرستیال قاضي عبدالهادي فضلي په گډون د دواړو پوهنتونونو استازو په کې برخه لرله. پيل کې د ننگرهار پوهنتون عمومي رئيس په خپلو خبرو کې د ښه راغلاست ترڅنگ، د هوکړهليک د بشپړ پلي کېدو په برخه کې د پوره همکارۍ ډاډ ورکړ. ورپسې د سيد جمال الدين افغاني پوهنتون د علمي چارو مرستیال د خپلې وينا پر مهال د هوکړهليک د پوره تطبيق ژمنه وکړه. د مسؤلينو له خبرو وروسته د متقابلو علمي همکاريو د لا پراختيا او ښې همغږۍ د رامنځته کولو په موخه د ننگرهار پوهنتون عمومي رئيس شيخ انعام الله مدني او د سيد جمال الدين افغاني پوهنتون د علمي چارو مرستیال قاضي عبدالهادي فضلي له لوري هوکړهليک رسماً لاسليک شو. د هوکړهليک د لاسليک په موخه ترتيب شوې دغه ناسته چې د قرانکريم د څو مبارکو اياتونو په تلاوت سره پیل شوې وه، په دُعايه کلماتو پای ته ورسېده.
