د کونړ سيد جمال الدين افغاني پوهنتون او د لغمان پوهنتون ترمنځ د گډو علمي او څېړنيزو همکاریو هوکړهليک لاسلیک شو
د يادو علمي بنسټونو ترمنځ د متقابلو همکاریو هوکړهلیک چې د سيد جمال الدين افغاني پوهنتون عمومي رئيس الحاج مولوي عبدالواسع منصور او د لغمان پوهنتون عمومي رئيس شيخ محمد منير حقاني له لوري د سيد جمال الدين افغاني پوهنتون د مسلکي پرمختيا آمريت د غونډو په تالار کې لاسلیک شو، په مراسمو کې يې د سيد جمال الدين افغاني پوهنتون مرستيالانو، د پوهنځيو رئيسانو او منصوبينو ترڅنگ؛ د لغمان پوهنتون مشرتابه او مسؤلينو هم برخه لرله.
مراسمو ته د سيد جمال الدين افغاني پوهنتون عمومي رئيس الحاج مولوي عبدالواسع منصور په خپلو خبرو کې د پوهنتونونو ترمنځ د گډ تفاهم هوکړې ډېرې مهمې يادې کړې، چې په پايله کې يې يوې ادراې ته د بلې ادارې له امکاناتو او ظرفيتونه څخه د گټې اخيستنې زمينه برابرېږي. نوموړي په خپلو خبرو کې د هوکړهليک پر بشپړ علمي کېدو ټينگار وکړ او زياته يې کړه، چې د دې هوکړهليک په لاسليک سره به د دواړو پوهنتونونو تفاهم او همغږي نوره هم زياته شي.
غونډې ته د لغمان پوهنتون عمومي رئيس شيخ منير احمد حقاني په خپلو خبرو کې وويل، چې د دې هوکړهليک لاسليک به د دواړو علمي بنسټونو ترقۍ ته پوره زمينه برابره کړي او په عموم کې به د لوړو زدهکړو وزارت د پرمختگ سبب وگرځي. نوموړي د هوکړې پلي کېدو په برخه کې د بشپړې همکارۍ ژمنه وکړه.
ورپسې د سيد جمال الدين افغاني پوهنتون د علمي چارو مرستيال قاضي عبدالهادي فضلي او د لغمان پوهنتون د ادبياتو او بشري علومو پوهنځي رئيس پوهنمل سردارولي اسرار په خپلو ويناوو کې د اړوندو پوهنتونونو د ظرفيتونو، خدماتو، اسانتياوو او لاسته راوړنو په تړاو هر اړخيز معلومات وړاندې کړل. د يادونې وړ ده چې د لغمان پوهنتون عمومي رئيس په مشرۍ راغلي پلاوي د کونړ سيد جمال الدين افغاني پوهنتون له بېلابېلو برخو څخه هم عملاً ليدنه وکړه او د دې پوهنتون په پرمختگونو يې خوښي وښوده.
