له کمپیوټرساينس پوهنځي څخه په يوولسمه دوره کې ۸۱ تنه مسلکي کادرونه فارغ او د ټولنې خدمت ته وړاندې شول
سيد جمال الدين افغاني پوهنتون د کمپیوټرساينس پوهنځي له دوو څانگو څخه د لېسانس په کچه تر څلور کلنو مسلکي او تخصصي زدهکړو وروسته په يوولسمه دوره کې(۸۱) تنه محصلين فارغ او ټولنې ته د خدمت په موخه وړاندې شول.
په دې تړاو جوړه شوې غونډه کې چې د سيد جمال الدين افغاني پوهنتون په تالار کې رابلل شوې وه، د پوهنتون عمومي رئيس الحاج مولوي عبدالواسع منصور، کونړ ولایت د جهادي مدرسې مهتمم شيخ عبدالقهار صديقي، د پوهنتون مرستيالانو، د ځېنو ولايتي ادرو استازو، د پوهنځيو رئيسانو، د پوهنتون استادانو او اداري کارکوونکو، فارغېدونکو محصلينو او هغوی د کورنیو غړو برخه لرله.
غونډې ته د پوهنتون عمومي رئيس په خپلو خبرو کې فارغېدونکو محصلينو او د هغوی کورنيو ته مبارکي وويله او زياته کړه چې دا ستاسو د زدهکړو پای نه دی او لا نورې لوړې زدهکړې وکړئ، د خدمت جذبه مو همداسې لوړه وساتئ او څه مو چې زدهکړي دي د ملک د پرمختگ او ولس د هوساينې لپاره ترې په صحيح نيت سره اعظمي استفاده وکړئ. نوموړي په خپلو خبرو کې ولس او د محصلينو کورنيو ته ډاډ ورکړ چې فارغېدونکي کادرونه په اسلامي روحيې او مسلکي پوهې سره روزل شوي دي.
د غونډه په ترڅ کې د جهادي مدرسې مهتمم په خپلو خبرو کې وويل، چې د کمال په درجه سمبال مسلکي اشخاصو ته زموږ ټولنه او نظام اشد ضرورت لري نو ځانونه په پوره همت سره د کمال درجې ته ورسوئ او په ښه نيت سره د خپل ولس خدمت وکړئ.
په غونډه کې د پوهنتون د علمي څېړنو مرستيال پوهنوال دوکتور سيداصغر هاشمي، د کمپیوټرساينس پوهنځي رئيس پوهنيار ذاکرالله عزام او نورو ويناوالو په خپلو خبرو کې فارغېدونکو محصلينو ته مبارکي وويله او هغوی ته يې تر فراغت وروسته د مسؤليت په تړاو لازمې توصيې، لارښوونې او سپارښتنې وکړې. په پای کې غونډه فارغانو ته د تصدیق پاڼو له وېش وروسته، د شرعياتو پوهنځي رئيس مولوي کليم الله حقاني له لوري په دُعايه کلماتو سره پای ته ورسېده.
