پوهنتون کې د ریموټ سينسنگ او جغرافيايي معلوماتي سېستم(جي ای اس) په هکله اساسي او عملي روزنيز ورکشاپ پيل شو
د سيد جمال الدين افغاني پوهنتون استادانو، د کونړ ولايت د چاپېريال ساتنې او کرنې، اوبو لگونې او مالدراۍ رياستونو اړوندو اداري کارکوونکو ته د ریموټ سينسنگ او جغرافيايي معلوماتي سېستم(جي ای اس) په هکله اساسي او عملي روزنيز شپږ ورځنی ورکشاپ پيل شو.
د ورکشاپ په پرانېسته کې د ياد پوهنتون علمي مرستيال استاد صلاح الدين ايوبي د خپلې وينا پر مهال د ياد ورکشاپ اهميت او ارزښت بيان کړ او له برخهوالو يې وغوښتل چې له دې فرصت څخه د خپلې مسلکي پوهې او وړتيا په لوړونه کې اعظمي استفاده وکړي.
ياد ورکشاپ چې د پوهنتون د مسلکي پرمختيا آمريت له لوري د پوهنتون استادانو او اړوندو ولايتي ادارو د مسلکي کارکوونکو د ظرفيت لوړونې په موخه پلان شوی دی، د زراعت پوهنځي د دوه تنو استادانو؛ پوهنمل شاهدالله امن او پوهنيار سيد رحمت الله سادات له لوري به د شپږو ورځو پر دوام د ياد سېستم په تړاو د ورکشاپ برخهوالو ته مسلکي او تخنيکي معلومات او روزنه ورکړل شي او همداراز به د گډونوالو پوښتنو او عملي کار ته کافي وخت ځانگړی شي.
هېره دې نه وي چې د پوهنتون د مسلکي پرمختيا آمريت له لوري له ټاکل شوي پلان سره سم د ظرفيت لوړونې بېلابېلې برنامې دايرېږي، چې څو ورځې وړاندې هم د پوهنتون استادانو ته د اقتصاد پوهنځي استاد پوهنمل عمران رفيق په روزنيزې همکارۍ د(اس پي اس اس) سافټوير کارونې په هکله شپږ ورځنی روزنيز ورکشاپ داير شوی ؤ.
