پوهنتون د علمي څېړنو او مجلو معاونيت د خپلو کړنو او لاسته راوړنو کلنی راپور د لوړو زده کړو وزارت د څېړنو، تاليف او ژباړې له رياست سره په انلاين بڼه شريک کړ
د سيد جمال الدين افغاني پوهنتون د علمي څېړنو او مجلو مرستيال پوهندوی دوکتور سيد اصغر هاشمي د لوړو زده کړو وزارت د څېړنو، تاليف او ژباړې رياست په نوښت جوړ شوي انلاين کنفرانس کې د ياد معاونيت د کلنيو کړنو او لاسته راوړنو راپور وړاندې کړ.
په دغه غونډه کې چې د نورو پوهنتونونو د علمې څېړنو او مجلو مرستيالانو، آمرینو، څېړونکو او د لوړو زده کړو وزارت اړوندو مسئولينو برخه اخیستې وه، پوهندوی دوکتور سيد اصغر هاشمي د تېر يوه کال په ترڅ کې د څېړنو پراختيا، علمي مقالو د نشر، علمي مجلو د ايجاد او معيار لوړولو او استادانو او محصلينو ته د څېړنو په اړه د روزنيزو پروگرامونو دايرولو په برخه کې ترسره شوي کارونه تشرېح کړل. ښاغلي هاشمي زیاته کړه چې د سيد جمال الدين افغاني پوهنتون د څېړنيزو معيارونو پياوړتيا او د استادانو او محصلینو د څېړنيزو ظرفيتونو د لوړولو لپاره پلان لري چې په دغه برخه کې لا نورې مهمې کړنې هم ترسره کړي. په پای کې د لوړو زده کړو وزارت د څېړنو، تاليف او ژباړې ریاست د سيد جمال الدين افغاني پوهنتون د هڅو ستاينه وکړه او د نورو پوهنتونونو لپاره یې د الهام وړ وبللې.
