د مالي او اداري چارو مرستيال په مشرۍ ناسته کې د حاضرۍ په پابندۍ او چارو کې پر چټکتيا ټينگار وشو
سيد جمال الدين افغاني پوهنتون د مالي او اداري چارو مرستيال حافظ مولوي محمدعثمان سعيد په مشرۍ تر سره شوې کاري ناسته کې چې د معاونيت اړوند آمرينو او عمومي مديرانو په کې برخه لرله او پر يو شمېر موضوعاتو يې بحث او پرېکړې وکړې.
په ياده ناسته کې د ځينو پوهنځيو لپاره د زيربناء پروپوزلونو، د معاونيت اړوند د تېر کال فعاليتونو راپور چمتو کولو، د بې وسه محصلينو لپاره د استوگن خونو کرايه کولو، له اړوندو برخو سره د تېر کال مالي او اداري راپور شريکولو او په نورو بېلابېلو موضوعاتو باندې بحث او پرېکړې وشوې او اړوندو چارو د اجراء په موخه ځانگړې کمېټې وټاکل شوې.
د پوهنتون مالي او اداري چارو مرستيال د يادو موضوعاتو په تړاو اړوندو مسؤلینو ته لازمې سپارښتنې او لارښوونې وکړې. ياده ناسته چې د قرانکريم د څو مبارکو اياتونو پر تلاوت پیل شوې وه، په دُعايه کلماتو سره پای ته ورسېده.
