د شرعي نظام په استحکام کې د اطاعت اغېزې کتاب د سیالۍ ممتاز گټونکي محصلین د یوې غونډې په ترڅ کې وستايل شول
دغه سيالي چې د محصلانو چارو معاونيت اړوند د محصلانو د خدمتونو او همغږۍ آمريت له لوري جوړه شوې وه، د پنځهگونو پوهنځيو شاوخوا(۳۰۰) تنو محصلينو په کې نومليکنه کړې وه، چې د جوايزو د وېش په مراسمو کې يې د پوهنتون رهبرۍ، د پوهنځيو رئيسانو، استادانو او محصلينو برخه اخيستې وه.
د سيد جمال الدين افغاني پوهنتون عمومي رئيس الحاج مولوي عبدالواسع منصور د اسلامي لارښوونو په رڼا کې د اطاعت گټې بيان کړې او زياته يې کړه، چې داسې برنامې د محصلينو د فکري او اصلاحي روزنې او د مطالعې ترويج لپاره ښه باعث کېدای شي. د پوهنتون عمومي رئيس په خپلو خبرو کې ممتازو محصلينو ته مبارکي وويله او د سياليو له تنظيموونکو يې مننه او د هغوی د هڅو يې ستاينه وکړه. نوموړي محصلين مخاطب کړل چې دا وړ برنامې ستاسو د ظرفيت لوړونې او کمال د حصول لپاره جوړېږي نو پراخ گډون په کې وکړئ.
غونډې ته د محصلانو چارو مرستيال مفتي شېر افضل منصور په خپلو خبرو وويل چې له يادې سيالۍ يې اصلي موخه ترلاسه شوې او محصلين د اطاعت له مفهوم سره پوره اشنا شوي دي. نوموړي زياته کړه چې په راتلونکي کې به د محصلينو د فکري او اصلاحي روزنې په موخه دېته ورته نورې برنامې هم دايرې کړي.
د يادونې وړ ده چې په ياده سیالۍ کې ممتازو بریالیو محصلینو ته لپټاپ کمپيوټر او نورې بېلابېلې ارزښتمنې ډالۍ ورکړل شوې.
