د پوهنتون استادانو ته د (TURNITIN) کارونې او پوهاوي په اړه معلوماتي سېمينار وړاندې شو

دغه يو ورځنی روزنيز سېمينار چې د سيد جمال الدين افغاني پوهنتون د علمي څېړنو او مجلې معاونيت په نوښت د ادبي غلا مخنيوي سافټوير (TURNITIN)  کارونې په هکله د پوهنتون معلوماتي ټکنالوژۍ په مرکز کې جوړ شوی ؤ، چې د پوهنتون علمي چارو مرستيال قاضي عبدالهادي فضلي، د علمي څېړنو او مجلې مرستيال پوهندوی دوکتور سيد اصغر هاشمي او لسگونو استادانو په کې برخه لرله.

ياد سېمينار د پرانیستې پر مهال د علمي چارو مرستيال استادانو ته لارښوونه وکړه چې له دې فرصت څخه د خپلې مسلکي پوهې او وړتیا په لوړونه کې اعظمي استفاده وکړي او په پوهنتونونو کې يې د دا ډول روزنيزو پروگرامونو دايرېدل مهم او گټور وبلل.

ورپسې د علمي څېړنو آمر پوهنمل دوکتور محمدسليم کريمزي د سېمينار اهميت او ارزښت په تړاو معلومات بيان کړل او له دې وروسته د ښوونې او روزنې پوهنځي استاد پوهنمل اسماعیل شینواري د ياد سافټوير په تړاو چمتو کړی پرېزېنټېشن وړاندې کړ او موضوعات يې په تيوري او عملي بڼه گډونوالو ته تشريح کړل او همداراز يې د هغوی پوښتنې هم ځواب کړې.