د سيد جمال الدين افغاني پوهنتون رييس د تنوير لوړو زده کړو له خصوصي مؤسسې څخه ليدنه وکړه
د سيد جمال الدين افغاني پوهنتون رييس پوهنمل محب الله محب؛ کونړ ولايت کې د تنوير لوړو زده کړو خصوصي مؤسسې څخه د ليدنې په ترڅ کې د محصلانو د مونوګرافونو دفاع په مراسمو کې ګډون او وينا وکړه.
په همدې مناسبت جوړې شوې غونډه کې د سيد جمال الدين افغاني پوهنتون د رييس په ګډون د ياد پوهنتون مالي او اداري چارو مرستيال قاري رحمن الله صادق، د تنوير لوړو زده کړو خصوصي مؤسسې رييس مولوي سراج الاسلام، د نوموړې مؤسسې استادانو او محصلانو برخه لرله.
غونډې ته د سيد جمال الدين افغاني پوهنتون رييس پوهنمل محب الله محب په خپلو خبرو کې فارغېدونکو محصلانو، د هغو کورنيو او په ځانګړي ډول د تنوير لوړو زده کړو خصوصي مؤسسې مشرتابه ته مبارکي وويله او محصلان يې لا نورو لوړو زده کړو ته وهڅول.
نوموړي فارغېدونکي محصلان مخاطب کړل چې هېواد د ودې او ابادۍ لپاره له اخېستل شوې روزنې او تر لاسه کړو وړتياوو کار واخلي.
ورپسې د تنوير لوړو زده کړو خصوصي مؤسسې رييس مولوي سراج الاسلام په خپلو خبرو کې د سيد جمال الدين افغاني پوهنتون د رهبري پلاوي له ورتګ د مننې تر څنګ وويل چې دا د نوموړې مؤسسې د دوه ګونو(حقوقو او سياسي علومو او اقتصاد) پوهنځيو لسمه دوره فارغېدونکي کادرونه دي چې د ټولنې خدمت ته يې وړاندې کوي.
د يادو مراسمو په څنګ د دواړو تحصيلي بنسټونو مشرتابه پلاوو د پسرلني سمستر له ازموینو ليدنه او څارنه هم وکړه.
ياده دې وي چې د سيد جمال الدين افغاني پوهنتون رهبري په کونړ ولايت کې د تنوير لوړو زده کړو له خصوصي مؤسسې څخه په دوامداره توګه ليدنې او له فعاليتونو يې څارنه کوي.
