د لوړو زده کړو وزارت په مشرۍ د پروان پوهنتون له لوري په داير شوي کنفرانس کې د سید جمال الدین افغاني پوهنتون لومړی مقام خپل کړ
دغه داخلي کنفرانس چې«د افغانستان په وده او پراختیا کې د معیاري تحصیلي نصاب ونډه» تر سرليک لاندې په پروان پوهنتون کې داير شوی ؤ، د کونړ سید جمال الدین افغاني پوهنتون استادانو له لوري ليکل شويو علمي-څېړنيزو مقالو په کې د هېواد په کچه د کيفيت او کميت له پلوه لومړی مقام خپل کړ.
د سید جمال الدین افغاني پوهنتون رهبري د دې لوړ علمي وقار د ترلاسه کولو له کبله په ټوله کې د لوړو زده کړو سرتاسري لويې علمي کورنۍ ته او په ځانگړي ډول د دې پوهنتون ټول زيارکښ پرسونل او محصلينو ته مبارکي وايي.
دا لومړی ځل نه دی چې د کونړ سيد جمال الدين افغاني پوهنتون په داخلي کنفرانسونو کې لومړی مقام خپلوي، تر دې وړاندې هم په دا وړ دوه ملي کنفرانسونو کې لومړی او په گڼو نورو کې يې د پام وړ مقامونه خپل کړي دي.
