د مالي او اداري چارو مرستيال د خپل معاونيت اړوند کمېټو له مسؤلينو سره ناسته وکړه
نن ورځ د سيد جمال الدين افغاني پوهنتون د مالي او اداري چارو مرستيال حافظ مولوي محمدعثمان سعيد د ياد معاونيت تر چتر لاندې د کمېټو له مسؤلينو سره ناسته وکړه چې په کې د روغتيا او خونديتوب، مالي، تفتيش او چاپېريال ساتنې د عمومي کمېټو مسؤلينو برخه لرله.
د ياد معاونيت اړوند کمېټو خپل راپورونه، ستونزې، غوښتنې او وړانديزونه له مالي او اداري مرستيال سره شريک کړل، چې د نوموړي له لوري ستونزو د حل او غوښتنو د پوره کېدو ډاډ ورکړل او همداراز يې په اړوندو برخو کې د کمېټو مسؤلينو ته لازمې سپارښتنې او لارښوونې وکړې. په دغه کاري ناسته کې د يادو کمېټو پر پاليسيو، پلانونو، راپورونو، مجالسو مهالوېش او نورو بېلابېلو موضوعاتو باندې بحث او لازمې پرېکړې وشوې.
